مجالس منتدى قرية المصنعة الرسمى - على طاري صباح الورد...

http://farm4.static.flickr.com/3081/...321cba40_m.jpg

على طاري صباح الورد, وإسمك, والحلا والذوق
ذكرتك يا أجمل أحلامي , بقافي واستهليته

على درب القصيد أسوق , قلبي والخطاوي شوق
وإذا مالت بي الخطوة , على دربك تناسيته

يهز الشوق بأعماقي , عناقيد الغرام عذوق
ويقطف بالغلا فيني , غرام(ن) خنت وأخفيته

أحبك كثر ما يشعل , غرامك في حشاي حروق
وشبٌه زود لو يحرق , ضلوعي مت ما اطفيته

أحبك دمعت(ن) طاحت , على خد الصباح اشروق
يموت النور لو طاحت , على كفي وضميته

أحبك , إيه أحب إسمك .وأموت بجيدك المنتوق
و تخيل كثر ما أكره صدودك , قمت حبيته

تموت من البطا غيمه , طعنها من جفاك بروق
وغشى روض الحشا وسمي , جفافك وإنت ما ارويته

رحلت , وما بقى منك سواك إنت , و عنا مفهوق
عنا ذاك الربيع اللي , غشاني ما تمنيته

تعال , إجرح على كيفك , تربع واستحل عروق
تدلل والبساط أحمر , وأنا لرضاك مديته

قم إسهج لآخر ضلوعي, تغلغل داخلي برفوق
حلالك ما بقى مني , مع اللي لأجلك أفنيته

من اللي من غديت أجمل قصيدة ما غدا له ذوق
ومن اللي كتب باسمك قصيده وانكسر بيته

وربي , من كتبت إسمك وبروزته بقلبي فوق
وأنا ما دار في بالي , قصيد ما تحاليته

دخيل دمعتين اللي, غدت منها الخدود شقوق
ترفق سامحك ربي , على قلب(ن) لك أهديته

إذا لك حق في قلبي , فأنا لي في غلاك حقوق
و حقوق الشوق محفوظة , وحدي ما تعديته

يذكرني صباح الورد , وإسمك , والحلا والذوق
وأردد يا ( أجمل أحلامي ) بقافي يوم هليته