مجالس منتدى قرية المصنعة الرسمى - هاذا ولدعم و هاذا ولد خال

بسم الله الرحمن الرحيم
السلام عليكم ورحمة الله وبركاته
اللهم صل على محمد وعلى آله وصحبه أجمعين
*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-*-**-*-*-*-*-*-*

ما دمت تنشد يا رفيقي عـن الحـال
مالـي علـى كتمانهـا عنـك حيلـه
الصبر عن بـوح الاحاسيـس قتـال
والبوح في بعض المواقف ، فشيلـه
لو كل مايطري علـى البـال ينقـال
ماكـان شفـت ان الثقيلـه ثقيـلـه
ابطيت اكافح ضيقـة البـال بالبـال
وادفـع بـلا هاجوسهـا كـل ليلـه
لين اقبلت مثل .. السحابـه بهمـال
تشفي غليـل اللـي تزايـد غليلـه
رعادها خيل تدابك وتختال
وبراقها لمع السيوف الصقيلة
طاحت ، ولاْوفق من حناياك منـزال
وسع فضا صدرك لفيض المخيلـه
ان قيل ترعد .. قلهم : صوت زلزال
وان قيل تبرق شف لها ادناة حيلـه
مابي .. تناقلها هـل القيـل والقـال
وتصير من بعـد القصيـره طويلـه
يابدر .. ماني عال .. لو صحتي عال
شفني من الصدمات نفسـي عليلـه
اشيـل حمـل ٍ لـو يشيلنـه جبـال
الله وامانـه غيـر تصبـح نثيـلـه
أرمي من هموم الزمن واسحب أدبال
وانزل عن ( الجوكر ) وغيري يشيله
من كثر ماشفت بحياتي مـن انـذال
بديت اشـك ان النذالـه ... فضيلـه
ماطاح من عيني رجل طاحوا .. رجال
ورجال ( يابن حنيف ) ماهي قليلـه
اقرب من اللي قالهـم ضمـن ماقـال
راكان بن حثليـن راعـي الجزيلـه
( هذا ولد عـم ٍ وهـذا ولـد خـال
وهـذا رفيـقٍ مالقيـنـا بديـلـه )
سبحان منهـو يابـدر غيّـر الحـال
وحط الجفـا بيـن الخليـل وخليلـه
هـذا الزمـن يبغالـه لـسـان دلاّل
من يستحي هالوقـت واعزتـي لـه
وقتٍ به ( الراعي ) غدى راعي دلال
كل ٍ علـى طاريـه ينفـض شليلـه
ومن كان ساسه للردى مضرب امثال
اليوم يحسـب مـن كبـار القبيلـه
المال يابن حنيف ملعون ابـو المـال
ذل العزيـز وعـز نـاس ٍ ذليـلـه