ياللي دفنتـوا جثتـه.. ليـه تبكـون؟

ياللي دفنتـوا جثتـه.. ليـه تبكـون؟
لولا الحيا..لأقـول : معكـم خذونـي
منه انحرمت وكنت انا عنـه مسجـون
ما أذكر لمحته .. غير مـره بعيونـي
شفته ..وكانت فرحتـي مالهـا لـون
عجزت لأوصف .. من لمحته شجوني
ياليتني ..كنت الكفـن يـوم تمشـون
ابقـى معـه بالقبـر ثـم تدفنـونـي
أو ليتني .. من خلفكم كنت (مجنـون)
أتبع خطاكم والعـذر هـو : جنونـي
أبكي وراكم .. وأدعي ان كان تدعون
ما يكفي انه عـاش عمـره بدونـي؟؟
تكفون < هاكم عمري اليـوم تكفـون
برخص حياتـي دام خابـت ظنونـي
ما فادني صبري !! ولا فادنـي عـون
ولا فادني دمع(ن) .. حرق لي جفوني
يا ما بكيتـه والبكـي يحـرق عيـون
ميت أو انه حي .. دمعـي بعيونـي!!
العام كان بفرحتـه.. يعـزف لحـون
واليوم ؛ تحت الأرض .. ماهو بكوني
لكن أنا في فرحتـه.. كنـت مدفـون
فوق الثرى .. واليوم موتـه سجونـي
..........................................
هو و الليالي .. عـن هنـاه امنعونـي
ياليتني.. ماعشـت لحظـه بهالكـون
و ياليت ربعي .. في سكات اذبحونـي
وياليتكم .. عن همّـي اليـوم تـدرون
منه انحرمت > ومن عزاه .. احرموني
حتى بوفاته !! يوم أنا طحت مطعـون
أخفيت طعناتـي .. قبـل يفضحونـي
بكيت!! لكن .. ماتظاهـرت بالهـون
أبكي وأقول : المـوت سبـة طعونـي