يمه

يا يمه منتهي جيتك وطالب منك الغفران /// اقبل قاعت اقدامك واغسلهااا بدمعاتي
يا يمه كل مافيني يناديلك انا ندمان /// طلبتك قولي سامحتك ردي لوجهي بسماتي
انا ادري قلبك الطيب كسرته بصدمت النكران /// غلطت وغلطتي هذي تعير كل غلطاتي
تشوفي الشيب يا يمه ترى ماجا وانا فرحان /// وربي الي رفع ذاتك ونزل لردى ذاتي
فقدت الراحه من بعدك فقدت الطيبه والتحمان /// بدونك راحتي غايه بدينك هذي راحاتي
انا بعدك ولا حاجه انا بعدك ترى عميان /// اشوف ولا اشوف الي يوريني مساراتي
انا وسيد الشقا والهم من بعدك غدينا اخوان /// يجيب اهموم ها العالم ويرميها بمتاهتي
صدقتي يوم قلتي لي تدين اليوم بس تندان /// رميتك في بدياتي ورموني في نهاياتي
انا من شالك بايده ورماك باسفل البركان ///نخيتني وطلبتيني ولا حصلتي نخواتي
مثل ماهنتي بعيوني عليهم قلبي يمه هان ///رموني وطعتهم فزعه وانا الدمعات فزعاتي
يايمه لا تظنيني انا من فعلهم زعلان /// سوات فيك سويته وسوو فيني اسواتي
يا يمه يالله ضميني ودفيني بهالاحضان /// انا ادري فيك مشتاقه وهمك بس ملاقاتي
يا يمه حيل ظميني ابي ارتاح انا تعبان /// تعبت اهرب من ذنوبي ابيك آخر مسافاتي
ابسمع منك اي كلمه نسيتك مسمعي ولهان /// ابسمع يمه بصوتك ابذكر فيها نشواتي
اشوفك ساكته يمه غفيتي ولا انا غلطان /*/*/ غفيتي يا بعد عمري تعبتي من مواساتي ؟
يا يمه يايمه طالبك قومي اذا لي بعيونك شان/*/*/ اشوف االموت بعيونك عساها بخيب هقواتي
تعالوا يا بشر شوفوا انا محتار انا تلفان/*/*/ انا امي مدري وش فيها انا مدري انا احاتي
شنو امي انا ماتت لا لا ترى غلطان /*/*/ انا امي ما تخليني على حزني ووناتي
انا امي قلبها طيب ولا يمكن تبكي انسان /*/*/ انا امي ما تبكيني ولا تتمنا اهاتي
يا يمه صح مامتي ؟ وصح الموت تو ما حان /*/*/ اذا متي انا بعدك ابقضى وين ساعاتي
يا يمه قومي يا يمه وقولي الموت لا ماكان /*/*/ انا جيتك وانا ناوي اندي فيك جناتي
تركتيني ومتي ليه تركتيني وانا غرقان /*/*/ ولا مسموح يا وليدي ولا تلعنك لعناتي
انا الجاني وانا المجني وانا المخطي وانا الندمان /*/*/انا بيدي رميتك ايه وبعثرته ملفاتي
وجيت من الهنا مفلس وقلبي من الضنا خسران /*/*/ تركتيني على ناري اعدد فيك زلاتي
ولاني مرضين ربي ولاني تابع الشيطان /// انا بعدك ترى مابين نهاياتي وبداياتي
يا يمه منتهي جيتك وكل مرتجي غفران /// وشفت الناس تعلني وتحذرني من الاتي
يمـــــــــــــــــــــــــــــــــه)

يمه انا ودي اقول للناس
عن الشيمه عن الحسره عن الاحساس
عن العمر اللي ملاه الياس
انا ودي احكيهم, اضحكمهم,ابكيهم
عن الدمعه وليل الخوف
عن القصه حروف حروف
عن جروح تسافر بي وترقى
ثم تحول بي مثل غيري من الاجناس
وانا عمري يقول يمه
وانا فرحي يقول يمه
وانا جرحي يقول يمه
اذكرهم,افكرهم.
اسولف عن جروح وليل
احبك يا غلاتي حيل
اذكرهم وانا توني صغير مرقدي صدرك
لحافي يجمعه صدرك
ضحاكي مبعثه صدرك
وزادي منبعه صدرك
واداري الجرح من صدرك
تربينا على كلمه
تجمعنا على كلمه
تحابينا على كلمه
غطانا كلنا بلحاف
وزاد ناكله بصحاف
وحنا مثلنا الاف
تلم القرش فوق القرش
نبي نشري ثياب وفرش
نبي نجبر خواطرنا
ورب الكون يسترنا
تقولي للولدمنا: ابيكم للزمان رجال
ابيكم فارس وخيال
ابي لا صاح فيكم جار
يبيكم والزمن دوار
تفز وا له صغار كبار
ابشرح بعض قصتنا
وكل الناس قصتنا
ليا اذن مطوعنا
يجي صوته في مسمعنا
تصيحي يا ولد صلوا
توضينا ,تصابحنا وصلينا
رفعنا للسماء كلمه
تصعدها بواكينا
وبعد نص الملا ما فاق
الا يا كاتب الارزاق
الا يالله تهدينا
اعرف إن الجروح كبار
واعرف إن الزمن دوار
وانا اذكر وش تغدينا
وما به شيء بيدينا
انا اذكر يوم صار العود على كيفه
وتباكينا .انا باذني سواليفه
وممشانا على كيفه
انا اذكر طفيه الفانوس
وانا اذكر لذعه الناموس
وطعم الرز والمعدوس
ولا به شرح او قاموس
انا اذكر ثوبي البالي
واشوف الحال بعيالي
وانا اذكر صيحه الفران
وانا اذكر ونة الجوعان
انا اذكر كل ذا ....كله
ندور للخبز بله
انا اذكر لا شكى شاكي
صفعتيني وانا باكي
انا اذكر دعسة خطاكي
تقولي يا ولد جنيت
تطارد يا خبل لونيت
انا اذكر كل ذا واسأل
زمان راح واتبدل
وذاك القرص من ايدك
تعجنينه.تلمينه.تخبزينه.وانا فرحان
انا اذكر صيحه الفران
تبدل كل شيء فينا
ماعاد به شيء يكفينا
انا اذكر اول بجامه
وثوب مشترى للعيد
وانا اذكر اول عمامه
وفرحه خالتي بالعيد
انا اذكر يوم ما به شيء
بعدنا ما عرفنا شيء
ودمعات الفرح منك
تعبر بالفرح عنك
انا اذكر شايب مرحوم
واشوفه مرتكي لليوم
يصيح بنا ...يعذبنا...عيالي ولموا الدله
اناظر وافتزع يمه
عطيني البيز يا يمه
تسمي ثم تقولي لي
ترفق لا تطيح يمه
ولا منه قعد راسه
تمدد صار بنعاسه
زعق فيني علامك ما تغطيني
اقول ابشر ...احس البرد وازيده من بطاطيني
انا اذكر خالتي حمده .ومقبوله. ومستوره
اسامي تمتلي صوره
انا اذكر حمست المحماس
انا اذكر دقة المهراس
انا اذكر ما مت الدافور
وربعي وخاطري المكسور
انا اذكر حارتي تبكي
بعضهم يشتكي جوعان وانا اذكر دخلت الضيفان
وخالي وعزوتي جمعان
انا اذكر صيحه العسه
ووجوع الليل مندسه
تبي تدفى على الكانون
ولا به حظر او قانون
ولا به رأفت الهجان
وانا اذكر موضه القيطان
وصوت العنز واللبان
رواية في زمان كان
انا اذكر يوم قالوا عيد
وانا عيدي بزنوبه
وانا احفظ سوره الاخلاص
وارتل سوره التوبه
وانا اعرف حظي المسكين
كبار القوم هجوا به
وانا احلف لو بيارقنا
على التاريخ منصوبه
يباريني نزيف الجرح
ويسأل وين ودوا به
اقوله وش تبي يا جرح
تبي تاخذ على نوبه
تبي تحرس معاناتي
وكل الارض مقلوبه
تبي تسكن على قبري
وانا المدفون في ثوبه
وعمي مات في بيته
وخالي قد تغدوا به
انا جرحي يسافر بي
وليت الناس حسوا به
انا اذكر كل ذا يمه
انا اعرف حاجتك يمه
انا اذكر جرحنا يمه
انا اذكر سقيانا من الزفه
انا وعياللك الحلوين ملتفه
نبي ندفى من الكانون
نبي نشرح وجاع عيون
نبي نملا جياع بطون
نبي نصرخ و نملا الكون
انا اذكر كل ذا مدفون
تبين الصدق يا يمه
انا بذاك الزمن مجنون
عرفت اشلون لاصحتي احب راسك
عرفت اشلون لا صمتي ولا افطرتي
ولا باعك بعض ناسك
انا اذكر يوم نتباري
ولاحد موذي جاره
ولنا قانون بالحاره
يفسر قصه الدنيا
غريبه قصه الدنيا
انا اذكر دمعتي بعيني
وثيقه بينك وبيني
تعذبني..تكذبني..تعاتبني
تبي تقبض على رمشى وتسحبني
ولا صحتي انا ويني
واشوف الدرب بعيوني
اشوف البرق بسنوني
انا منهم وانا بدوني

انا حظك وانا منك
وارد المايله عنك
تذكرني بسواليفك
وانا اراقب مذاريفك
في ذاك الجرح في الكتمان
وين اللي جرح انسان
وين اللي نزف انسان
وين اللي بكى انسان
انا اذكر قصه الشراب
تحول بيدنا كوره
وانا اذكر قصه الطلاب
واستاذي وباكوره
انا اذكر لعبه الشرعى
وبعض اغنامنا ترعى
ونشرب كلنا بمغراف
عدل وانصاف
وعمي صالح القطان
ينجد للجميع لحاف
كبرنا بالعمر يمه
تغربنا .. تباعدنا.. تعذبنا
نبي نلحق بباقي الناس
نبي نشيلك بعالي الراس
نبي نطرد من الوسواس
جروح القلب والاحساس
بعضنا غادر الديره
بعضنا غاص في الحيره
ولكنا حفظنا الروح
ومعنى الحب والحيره
بعضنا ما قرا كلمه
وبعضنا فز من حلمه
وبعضنا طاح به علمه
ندور وين وش صرنا
ولا به نو يمطرنا
وصرنا مثل باقي الناس
نصارع في كلام الناس
نعاين في وجوه الناس
تغير كلها في الناس
انا يمه.انا ودي اصارحكي
وعيني ما تبارحكي
ابيكي تصفحي يمه

فالك التوفيق والملاين

كل سطر اجمل من الي قبله
مشكور والله

ما فيك حيلة


شكوررررررررر

فعلاً كل سطر اجمل من الي قبله
مشكور والله

انا اعجبني البيت اللي يقول فية

انا امي قلبها طيب ولا يمكن تبكي انسان /*/*/ انا امي ما تبكيني ولا تتمنا اهاتي


صحيح ان قلب الام مافية اطيب منه ولا احن منة