جيل اليوم

السلام عليكم

انا زعلان من جيل اليوم

اسمعوبارك الله فيكم

اسمع بين الحزّه والحزّه من بعض اولادنا في ذا الزمن يقولون ايام زمان

ماهي بهيله وكلها شقا وتعب ومشاكل وكنّهم يقولون

الله لايرد الغلا ولا كيّاله

واقول لهم ذيك هي ايامنا وزماننا ولو عشتم فيها يمكن ماتقدرون

تعيشون زي ماعشنا انحن ذيك الايام طلّعت رجاجيل تحطهم على يمناك

من غير نقص في جيل اليوم ولكن كانو نشاما قول وفعل

صح ماكنا متعلمين ولكن الحياه علمتنا كل شي ونعرف اللي لنا واللي علينا

والله يافي زماننا ماكنا نسمع بواحد يدوخ ويطيح إذا ذبح خروف وشاف الدم

ولا كنا نسمع بالشباب اللي يسوون كما النسوان في اشكالهم ( اصبحت ظهيره يالرفاقه)

ولا كنا نسمع ان واحد من الاولاد يخرج عند الباب اذا جاهم ضيف ويقول : آبي يقول

لك ماهوب في البيت

ولا كنا نسمع ان الولد راقد في النهار وطول الليل صاحي في غير مصلحه

ولاكنا نسمع ان فلا ن عاطل وما يبغى الشغل لاوربي إلا الرجال يغدي

رجال ويكافح ويكون ملا العين وزياده

ياحباني
ماودي ازيد واعيد في الهروج وصُفّة اليوم فيها خير ومتعلمين احسن منا

ولكن ياولادي ماشي كما شي ولا الشمس كما العشي

زمان كان الولد يتحمّل كل شي من صُغره واما اليوم يتخرجون اولادنا

من الجامعه اذا فلحو زيد وقد انتصفت اعمارهم والأب يكد ويشقى عليهم

وبعضهم من يقل الله يكثر خيرك يابه وبعضهم مايزيد إلا يتكبر وينسى الجمايل

وذا جا عنده زميل يستحي يخرج ابوه عنده ويستحي يقل ذيّه آبي عشان انه

شيبه وما يقل إلا الشيبه جا والشيبه افلح

وما نقل الا الله يهديهم ويصلحهم لنفوسهم ويبعد عنهم اولاد الحرام


علوم ابوكم الشيبه وعفاكم وعفا الجميع