مصير الحي يتفارق

مصير الحي يتفارق....

(مصير الحي يتلاقى)عباره تعمي العشاق ..

بها العاشق يصدق لاغدا وسط الوهم غارق

عبارة كذب ..أما الصدق أصلاً هالحياة فراق

إذاً أفضل كذا نكتب (مصير الحي يتفارق) !!

وَهَم كل الحياه .. وكلها هم ولاتنطاق

ودايم في سما نفس المتيم حزنها شارق

تسابقنا ظروف الوقت لوصال الحبيب سباق

وتسبقنا على وصله ... وترسل للفرح سارق !!

وكم من عاشق كان يترقب للوصال وثاق

وصادم واقعٍ أخفى وميض للألم بارق

حبيبي لاستحال الوصل كيف نترجم الأشواق ؟!

زمانٍ يتعب التفكير لو كان الذكا خارق

حبيبي كنت أبي أمدحك واذكر وش كثر مشتاق

ولكني شغلت بدم دنيا همها حارق

لذلك قلت بالمبدأ ترى الدنيا ألم وفراق

وترى افضل كذا نكتب (مصير الحي يتفارق) !!